Kurti del me një premtim për opozitën

EPA/ERMAL META

Derisa Kuvendi i Kosovës akoma nuk po arrin të nis me seancën për zgjedhjen e presidentit, e cila është thirr për në orën 18, kryeministri Albin Kurti është lajmëruar sërish në rrjetet sociale.

Në një shkrim në profilin e tij në Facebook, Kurti thekson se mbrëmë fitoi opozita, derisa konsideron se sonte duhet të fitojë shteti, shkruan Albinfo.ch.

Ai konfirmoi se kanë tërhequr ligjin për zgjedhjet duke i premtuar opozitës se pas zgjedhjes së presidentes do të formohet një komision bashkë me opozitën për të përmbyllur reformën zgjedhore.

Postimi i plotë:

Mbrëmë fitoi opozita, sonte duhet të fitojë shteti. Zgjedhja e Presidentes së Republikës është fitore për Kosovën. Ajo nuk është kundër askujt dhe është për të gjithë. Me zgjedhjen e Presidentes përmbyllet hapi i tretë i konstituimit të institucioneve të legjislaturës së tetë.

Pas fitores me 50,28% të votave në zgjedhjet e 14 shkurtit, ne jemi shumica në Kuvendin e Kosovës. Mbrëmë deputetët tanë ishin shumica, por nuk ishin 2/3 e të pranishmëve. Nuk arritëm të procedojmë me projektligjin që ua mundëson mërgatës të votojë në ambasadat e konsullatat tona.

Ky Projektligj nuk kishte të bënte me reformën zgjedhore. Sidoqoftë, ai sot nuk është aktual. Sot kemi seancën për zgjedhjen Presidente të znj. Vjosa Osmani. Menjëherë pas kësaj formojmë komisionin ku bashkë me opozitën punojmë, pajtohemi dhe sivjet e përmbyllim reformën zgjedhore.