Kurti kërkon të ndahet procesi i anëtarësimit të Kosovës në BE nga normalizimi i marrëdhënieve me Serbinë

Kryeministri i Kosovës, Albin Kurti, në paraqitjen e tij pas samitit “Ballkani Perëndimor takon BE-në” të mbajtur sot në Shkup, ka thënë se ai sa herë që i vjen mundësia kërkon që të ndahet procesi i anëtarësimit të Kosovës në BE nga procesi i normalizimit të marrëdhënieve me Serbinë.

“Më 15 dhjetor të vitit 2022 kemi dorëzuar aplikimin zyrtar për anëtarësim në BE. Presim nga Komisioni Evropian pyetësorin me mijëra pyetje, e do të jemi të durueshëm e të vëmendshëm t’u përgjigjemi të gjithave. Por, nuk është fer që një shtet, ku vullneti për t’u anëtarësuar në BE është 94 për qind të mbetet peng i çështjes së normalizimit me një shtet, ku vullneti i anëtarësimit mbetet 35 për qind, e mbetet prapa nesh sa i përket sundimit të ligjit, respektimit të të drejtave të njeriut dhe të pakicave. Duhet të ndahet procesi i anëtarësimit të Kosovës në BE nga procesi i normalizimit të marrëdhënieve me Serbinë”, ka thënë ai, transmeton albinfo.ch.

Sipas tij, aktualisht dialogu po zhvillohet në nivel të kryenegociatorëve dhe se nuk ka diçka të re sa i përket ndonjë takimi të mundshëm të nivelit të lartë, teksa ka deklaruar se Kosova nuk ka vendosur ndonjë masë tregtare ndaj Serbisë, por thjesht ka masa sigurie dhe se ato do të mbeten derisa grupi terrorist prapa sulmeve në Banjskë të 24 shtatorit të mbetet i lirë në Serbi.

Ndër të tjera, i pyetur për nismën “Ballkani i Hapur”, kryeministri i Kosovës është shprehur se nuk është mjaftueshëm evropian teksa, sipas tij, plani për zgjerimin e BE-së “është mjaftueshëm i hapur”.