Kush votoi kundër rekomandimit për anëtarësimin e Kosovës në Këshillin e Evropës

Raporti u miratua me 31 vota për, 4 kundër dhe një abstenim

Komisioni për Politikë dhe Demokraci i Asamblesë Parlamentare të Këshillit të Evropës ka miratuar raportin (draft-opnionin) e Dora Bakoyannis, lidhur me kërkesën e Kosovës për anëtarësim në këtë organizatë.

Raporti u miratua me 31 vota për, 4 kundër dhe një abstenim.

Mësohet se dy vota kundër ishin të deputetëve të Serbisë, kurse nga një votë kundër ishte nga deputetët e Bosnjë e Hercegovinës dhe Malit të Zi, kurse deputeti i Greqisë, Aleksis Cipras, ka abstenuar.

Pas këtij votimi në Strasburg, çështja procedon në Asamblenë Parlamentare më 18 prill dhe nëse merr miratimin edhe në këtë institucion, atëherë fjalën përfundimtare për anëtarësimin e Kosovës duhet ta japë Këshilli i Ministrave të Këshillit të Evropës gjatë një mbledhjeje që do të mbajë në muajin maj, transmeton albinfo.ch.

Hapi i radhës, sipas këtij komiteti, do të jetë më 18 prill, kur do të hidhet në votim ky raport para Asamblesë Parlamentare në përbërjen e saj të plotë.

---