Kuvendi i sapozgjedhur duhet të konstituohet jo më vonë se 20 ditë pas zgjedhjeve

Deputetët zgjidhen me mandat katërvjeçar. Mandati i deputetëve verifikohet nga Kuvendi

Mandati i përbërjes së re të Kuvendit që u zgjodh në zgjedhjet e djeshme parlamentare nis të rrjedhë nga seanca konstituive e Kuvendit.

Sipas përcaktimeve të Kushtetutës së Maqedonisë së Veriut, Kuvendi i sapozgjedhur mblidhet në seancë konstituive jo më vonë se 20 ditë pas zgjedhjeve. Seancën konstituive e thërret kryetari i Kuvendit nga përbërja e mëparshme.

Nëse nuk caktohet seanca konstituive brenda afatit të caktuar, deputetët mblidhen dhe konstituojnë Kuvendin në ditën e njëzet e një nga dita e përfundimit të zgjedhjeve, transmeton albinfo.ch.

Kuvendi përbëhet nga 120 deputetë. Deputetët zgjidhen në zgjedhje të përgjithshme, të drejtpërdrejta dhe të lira me votim të fshehtë. Deputeti përfaqëson qytetarët dhe vendos në Kuvend sipas bindjes së tij.

Zgjedhjet për deputetë në Kuvend mbahen gjatë 90 ditëve të fundit të mandatit të përbërjes së vjetër parlamentare ose brenda 60 ditëve nga dita e shpërndarjes së Kuvendit.

Deputetët zgjidhen me mandat katërvjeçar. Mandati i deputetëve verifikohet nga Kuvendi.

Mandati i deputetëve në Kuvend mund të zgjatet vetëm në rast lufte ose të gjendjes së jashtëzakonshme.

---