Kuvendi i Kosovës zhvillon debat interesant për gjuajtjen me armë

Seanca ishte thirrur nga partia opozitare, Lidhja Demokratike e Kosovës, ndërsa në interpelancë u paraqit kryeministri Ramush Haradinaj

Një gjuajtje me armë zjarri në një aheng familjar nga Dardan Gashi, zëvendëskryeministër dhe ministër i Diasporës dhe Investimeve Strategjike, është bërë shkas që Kuvendi i Kosovës sot të zhvilloj një debat të ashpër me akuza e kundër-akuza ndërmjet koalicionit dhe opozitës. Seanca ishte thirrur nga partia opozitare, Lidhja Demokratike e Kosovës, ndërsa në interpelancë u paraqit kryeministri Ramush Haradinaj.

Vjosa Osmani nga LDK-ja ka folur për viktimat nga plumbat qorr, që kanë humbur jetën gjatë dy vjetëve të fundit, për të potencuar rëndësinë e zbatimit të ligjit dhe mos përsëritjes së rasteve të tilla.

Memli Krasniqi nga radhët e PDK-së, përderisa e dënoi veprimin e Ministrit Dardan Gashi, tha se ngjarjet e tilla nuk mund të ndalen menjëherë, kjo ngaqë është pjese e traditave dhe është mjaft e përhapur, e që gradualisht do të pësojë ndryshime. “Në qoftë se dikush më thotë se askush nga grupi parlamentar i tyre nuk ka gjuajtur me armë, unë do ju kërkoj falje” iu drejtua deputetëve Krasniqi.

Kryetari i Grupit Parlamentar të LDK-së, Avdullah Hoti tha se veprimi i Gashit dhe të tjerëve, është në kundërshtim me nenet e kodit penal dhe të etikës. Nga kjo parti pati thirrje për shkarkimin e Dardan Gashit.

“Në një vend normal pas një veprimi të tillë, ministri do të shkarkohej qysh kur ishte publikuar video. Ne kemi një situatë ku ministri e shkelë ligjin ndërsa kryeministri e arsyeton atë” tha Lumir Abdixhiku nga LDK-ja.

Kryeministri Haradinaj duke u përgjigjur në këtë interpelance tha se trajtimi i kësaj teme duhet të ktheje vëmendje kah zbatimi i ligjit, ndërsa për shkarkimin e Gashit ka thënë që është herët pasi që rasti është në procedurë ligjore.

Ky debat pati edhe momente qesharake, veçanërisht kur Glauk Konjufca nga VV-ja komentoi natën e gjuajtjes me armë, për të cilën tha nuk arsyetohet në asnjë mënyrë, nga askush, e sidomos nga zyrtarët e lartë të shtetit raporton KKosova.

“Por ta them të drejtën, unë nuk e arsyetoj, por e kuptoj Dardan Gashin. Në ato tubimet plot mish e raki, ku shahirat prejnë e grijnë, e ku burrëria shprehet në mënyrën e gjuajtjes me armë, bëhet njeriu edhe pa qenë trim fare. Kur i sheh të tjerët duke gjuajtur, thotë me vete: ‘Çka kam unë që të mos gjuaj?’” deklaroi Konjufca.