Granit Xhaka edhe tri javë jashtë fushës

Keystone (AP Photo/Darko Vojinovic)

Futbollisti Granit Xhaka, kapiten dhe lideri i Sunderlandit, do të mungojë edhe tri javë për shkak të lëndimit në nyjën e këmbës, ka konfirmuar trajneri Regis Le Bris në konferencën për shtyp.

33-vjeçari ka luajtur rol të rëndësishëm në sukseset e Sunderlandit në këtë kampanjë. Ai mungoi të shtunën e kaluar në humbjen 3:1 nga West Ham United teksa para ndeshjes që luhet të hënën ndaj Burnleyt, Le Bris konfirmoi se kapiteni i Zvicrës është mirë, por do t’i duhet ende kohë për pushim, transmeton albinfo.ch.

“Graniti është duke punuar mirë. Do ta vlerësojmë gjendjen e tij në javën e ardhshme, por me shumë gjasë do të mungojë edhe tri javë”, ka theksuar francezi.

Xhaka, i cili iu bashkua Sunderlandit në verën e vitit të kaluar nga Bayer Leverkuseni, ka luajtur në 23 ndeshje në të gjitha garat dhe ishte titullar në 22 ndeshje të Premier Leagues. Ai e ka një gol dhe pesë asistime.

Ai pritet të mungojë në duelet ndaj ish-skuadrës, Arsenalit, më 7 shkurt, dhe në shtëpi më 11 shkurt ndaj Liverpoolit.