Lajçak nis vizitën 3-ditore në Kosovë

Miroslav Lajčák

Raportohet se emisari special evropian për dialogun Kosovë – Serbi dhe çështje të tjera rajonale të Ballkanit Perëndimor, Miroslav Lajçak, do të vizitojë Kosovën nga sot deri më 29 qershor, përcjell albinfo.ch.

Referuar Zyrës së BE-së në Kosovë, gjatë vizitës së tij, diplomati sllovak do të takohet me kryeministrin Albin Kurti, liderë të opozitës dhe përfaqësues të bashkësisë ndërkombëtare në Kosovë.

“Gjatë qëndrimit në Kosovë, ai planifikon të vizitojë edhe Prizrenin dhe veriun e Kosovës. Fjalimi për media i Lajçak është planifikuar për të mërkurën (29 qershor). Detajet do të ndahen me përfaqësuesit e mediave të martën, më 28 qershor”, thuhet në njoftim.

Kjo është vizita e parë e Lajçakut pas nënshkrimit të udhërrëfyesit ndërmjet Kosovës dhe Serbisë për zbatimin e marrëveshjes për faturimin e energjisë në veri të Kosovës, e firmosur nëntë vite më parë.

Vizita e Lajçak, besohet se është në kuadër të përgatitjes së një takimi të nivelit të lartë në kuadër të dialogut, i cili është paralajmëruar se mund të ndodhë së shpejti.

Pas Kosovës, Lajçak do të vazhdojë vizitën në Serbi.