Lajçak: Statuti i Asociacionit është dokument i brendshëm i Kosovës, nuk nevojitet nënshkrimi i Serbisë

Miroslav Lajčák

I dërguari i posaçëm i Bashkimit Evropian për dialogun Kosovë – Serbi, Miroslav Lajçak, ka thënë se Statuti i Asociacionit të komunave me shumicë serbe është dokument i brendshëm i Kosovës për çka nuk kërkohet nënshkrimi nga Serbia.

“Më lejoni të shtoj edhe një pikë në lidhje me kërkesën e Kosovës që Serbia ta nënshkruajë Statutin. Sipas pikëpamjes sonë, kjo nuk është e nevojshme. Akti ligjor, ashtu sikur është i dizajnuar tani, është paraparë të jetë dokument i brendshëm i Kosovës. Me nënshkrimin e Kosovës dhe Serbisë, Statuti do të bëhej marrëveshje ndërkombëtare, çka nuk është”, ka thënë ai, për Express.

Lajçak ndër të tjera i ka shfaqur brengat e tij për ngurtësinë e palëve në zbatim të marrëveshjes, por për herë të parë ka përmendur afate dhe obligime që kanë palët në proces, përcjell albinfo.ch.

Në shkëmbim të kësaj, ai është treguar i hapur për të bërë rregullime në draft të Statutit, ndërsa i pyetur nëse teksti duhet të dërgohet fillimisht në Gjykatën Kushtetuese, ai deklaroi se një gjë e tillë është paraparë në vitin 2015.

“Me Marrëveshjen e vitit 2015 është paraparë që Draft-Statuti për themelimin e Asociacionit të shqyrtohet nga Gjykata Kushtetuese. Asociacioni do të themelohet në Kosovë, si pjesë e kornizës ligjore të Kosovës. Për ne, si komunitet ndërkombëtar, është në interesin tonë që Gjykata Kushtetuese ta shqyrtojë. Për më tepër, vendimi i Gjykatës Kushtetuese i vitit 2015 e ka kërkuar qartë shqyrtimin gjyqësor të një draft-statuti të mundshëm”, ka shtuar tutje ai.