Laura Fazliu në finale të Grand Prix Linz pas fitoreve bindëse

Laura Fazliu shkëlqen në Linz, siguron finalen me fitore bindëse

Xhudistja kosovare Laura Fazliu po vazhdon paraqitjet e shkëlqyera në turneun ndërkombëtar Grand Prix Linz, duke siguruar kualifikimin në finale pas një tjetër fitoreje bindëse në gjysmëfinale, shkruan albinfo.ch.

Në këtë fazë, Fazliu triumfoi ndaj xhudistes gjermane Sara-Joy Bauer. Ajo fillimisht realizoi një Waza-ari, ndërsa më pas me një superhedhje e mbylli luftën me Ippon, duke vulosur vendin në finale të kategorisë deri në 63 kilogramë.

Rrugëtimi i saj drejt finales nisi me një performancë shumë bindëse në xhiron e dytë ndaj xhudistes nga Slovenia, Leila Mazouzi. Fazliu realizoi dy aksione për Yuko, përpara se ta përfundonte ndeshjen me Ippon.

Në përballjen pasuese, xhudistja kosovare ishte po aq dominuese edhe ndaj kroates Nina Cvjetko. Ajo realizoi një hedhje për Waza-ari dhe më pas e mbajti kundërshtaren në tokë për Ippon, duke siguruar kalimin në gjysmëfinale.

Fazliu garon në kategorinë deri në 63 kilogramë dhe në këtë turne mban statusin e bartëses së dytë, duke u konsideruar një nga pretendentet kryesore për medalje.

Në edicionin e sivjetmë të turneut në Linz po marrin pjesë 479 xhudistë nga 59 shtete të botës, duke e bërë këtë garë një nga ngjarjet më të rëndësishme të kalendarit ndërkombëtar të xhudos.

---