LDK: Mërgimtarët u injoruan nga Qeveria

LDK është e shqetësuar me numrin e vogël të votuesve në mërgim për të votuar në zgjedhjet e ardhshme lokale. Kjo parti akuzon qeverinë që nuk i ka informuar mërgimtarët

Qeveria e Kosovës është fajtor që nuk e ka informuar mërgatën kosovare për të votuar në zgjedhjet e 3 nëntorit. Kështu konsideron partia më e madhe opozitare, Lidhja Demokratike e Kosovës, sipas të cilës, diaspora ka interesim për të votuar, por qeveria po ua pamundëson atë.  

Reagimi i LDK-së ka ardhur pasi që Komisioni Qendror i Zgjedhjeve ka certifikuar vetëm 1800mërgimtarë për të votuar në zgjedhjet e 3 nëntorit. Kjo shifër kaq e vog[l i ka shqetësuar kryesisht partitë opozitare.    

“LDK është e shqetësuar me numrin e vogël të votuesve në mërgim të regjistruar për të votuar në zgjedhjet e ardhshme lokale. Në kontaktet e përditshme që LDK ka me qytetarët jashtë vendit, është vërejtur interesim i madh për pjesëmarrjen në zgjedhje, por kjo nuk u është mundësuar”, konsideron LDK.

Sipas kësaj partie, numri i vogël i votuesve nga jashtë është rezultat i organizimit jo-adekuat të ambasadave dhe konsullatave të Kosovës si dhe mos angazhimit të qeverisë për të gjetur një zgjidhje për këtë çështje për shumë vite me radhë.

Në votimet e kaluara, me mijëra aplikacione të këtyre qytetareve nuk janë marrë parasysh, konsideron partia që drejtohet nga Isa Mustafa.

“Fatkeqësisht, Ambasadat dhe Konsullatat e Kosovës nuk po i kryejnë detyrat e tyre të informimit adekuat të mërgimtarëve për procedurat e regjistrimit dhe votimi. Andaj ftojmë Komisionin Qendror të Zgjedhjeve dhe Qeverinë e Kosovës që përmes ambasadave dhe konsullatave tona në shtete të ndryshme, të përmbushin obligimin e tyre ndaj qytetarëve tonë në mërgim”, kërkon LDK.

 Sipas partisë më të madhe opozitare, Kosova duhet t’iu ofrojë informacione dhe mundësi më të mëdha mërgimtarëve për aplikim dhe votim.