Leon Avdullahu në Kosovë, optimist për ndeshjen me Zvicrën

Foto FB: Agim Ademi

Leon Avdullahu ka arritur sot në mëngjes në Kosovë, teksa pas pak ditësh, Avdullahu do të udhëtojë për në Basel, ku do të luaj ndeshjen ndaj Zvicrës, përfaqësueses së vendit ku u lind dhe u zhvillua si lojtar.

Ai ka folur për herë të parë për vendimin që e mori javën e kaluar për t’iu bashkuar Kosovës ndërsa është pritur në aeroport nga kryetari i Federatës së Futbollit të Kosovës, Agim Ademi, transmeton albinfo.ch.

Sipas tij, projekti i FFK-së ia ka bërë edhe më të lehtë vendimin për ta përfaqësuar Kosovën e jo Zvicrën në nivel ndërkombëtar.

“Shpresoj të fitojmë, të bëjmë lojë të mirë. Zvicra është favorite, por edhe ne kemi ekip të mirë dhe do të jetë lojë e fortë. Do ta jap gjithmonë maksimumin për Kosovën. Kam zgjedhur me zemër dhe për projektin”, thotë mesfushori.

Sa i përket ndeshjes me Zvicrën, ai tha se Kosova ka gjasat e saj në grup.

“Gjithçka është e mundur dhe jam gjithmonë optimist dhe pozitiv”, ka thënë ai.