Lëshohen dokumentet edhe në Ambasadën e Shqipërisë

E para që aplikon për pasaportën e re të Republikës së Shqipërisë është artistja e madhe Vaçe Zela

Me datën 12 qershor  në ambasadën e Republikës së Shqipërisë në Bernë filloi zyrtarisht shërbimi i aplikimit të shtetasve shqiptarë për dokumente identifikimi. Qytetarët e Republikës së Shqipërisë që jetojnë në Zvicër ose në vendet fqinj si Franca, Gjermania etj. tashmë nuk do të kenë nevojë të shkojnë domosdo në Tiranë apo në Paris, Berlin etj. që të aplikojnë për t’u pajisur me letër-njoftimi (kartë identiteti) ose me pasaportë.

Ata kanë mundësi të vijnë edhe në ambasadën e Bernës, ku  do të kryhet ky shërbim, thuhet në një njoftim të ardhur nga Ambasada e Republikës së Shqipërisë në Bernë.

Personi i parë që ka aplikuar për të marrë pasaportën e Republikës së Shqipërisë në ambasadën e Bernës është këngëtarja Vaçe Zela.  Artistja e madhe jeton me familjen në Bazel.

Në ceremoninë e hapjes zyrtare të këtij shërbimi ndodheshin ambasadori Mehmet Elezi, përfaqësues të Ministrisë së Punëve të Brendshme të Republikës së Shqipërisë, përfaqësues të kompanisë Safran Aleat, që ka marrë përsipër përgatitjen e  dokumenteve të identifikimit dhe qytetarë shqiptarë me banim në Zvicër.

Rikujtojmë se dokumentet e identifikimit në ambasadën e Bernës lëshohen vetëm për shtetas të Republikës së Shqipërisë, perfundon njoftimi i Ambasadës.