Letra e Xhakës kthen opinionin zviceran kundër tij

Granit Xhaka është nën presion të madh. Pas letrës drejtuar tifozëve shqiptarë, ‘Blick’ ka bërë disa shkrime për të. Rreth letrës kanë shkruar edhe shumë media tjera zvicerane

Pas letrës që publikoi futbollisti i Arsenalit dhe përfaqësueses zvicerane, Granit Xhaka, përmes së cilës bëri të qartë se ai kishte bërë kërkesë që të luante me Kosovën pas pranimit të saj në UEFA dhe FIFA dhe se ishte i gatshëm ta linte kombëtaren e Zvicrës, kanë reaguar mediat e shtetit helvetik, shkruan albinfo.ch.

Gazeta e njohur zvicerane “Blick” ka botuar në versionin e saj online një artikull me një intervistë të Xhakës, të dhënë për “Blick” në muajin maj të këtij viti, rreth një muaj para fillimit të Kampionatit Evropian, në të cilën Xhaka shprehej i bindur se nuk e mendon largimin nga Zvicra.

“Para Kampionatit Evropian ai dukej krejt ndryshe. Granit Xhaka flirton me Kosovën”, është titulli i gazetës zvicerane, e cila thotë se Graniti kishte deklaruar qartazi se nuk e mendonte fare kalimin tek Kosova.

Në intervistën e majit, të publikuar edhe një herë tjetër në “Blick”, Xhaka thoshte se nuk do të luante për Kosovën, pasi e kishte vendosur një herë e përgjithmonë për Zvicrën. Madje kur pyetej se a do të kishte dëshirë të bëhej ndonjëherë trajner i përfaqësueses kosovare, Xhaka deklaronte: “Përse jo i kombëtares së Zvicrës”.

“Unë jam krenar që Kosova ka një ekip kombëtar, por unë jam me fat që luaj për Zvicrën. Unë e kam bërë njëherë zgjedhjen dhe kjo është e gjitha”, ka thënë Xhaka në intervistën e 18 majit, e ribotuar së fundmi nga e përditshmja “Blick”.

“Blick” pretendon se Granit Xhaka nuk u tregua i sinqertë me zviceranët, dhe se gjatë gjithë kohës ka “flirtuar” me Federatën e Futbollit të Kosovës.

“Flirtoi sërish me Kosovën nga hoteli i skuadrës kombëtare. Çfarë duhet të bëjmë tani”, ngre një pyetje të sikletshme e përditshmja “Blick”, për talentin e përfaqësueses helvetike. Një situatë intriguese kjo, duke patur parasysh se në debat u përfshi dhe babai i futbollistit të Arsenalit, Ragip Xhaka.