Liderët me pasaporta shqiptare, qytetarët e izoluar

Kosova është i vetmi shtet në Ballkanin Perëndimor që ende nuk mund të lëvizë pa viza

Qytetarët e Kosovës janë të vetmit në Ballkanin Perëndimor që nuk mund të lëvizin lirshëm. Para tetë vjetësh, BE-ja ka liberalizuar vizat për një shtet të Ballkanit Perëndimor, raporton KTV.

Atë kohë, të gjitha vendet, pos Kosovës, nisën lëvizjen e lirë brenda Zonës Schengen, përcjell albinfo.ch.

Kjo, vazhdon të jetë e pamundur për qytetarët e Kosovës, por jo edhe për politikanët që udhëheqin këtë shtet.

Kosova është i vetmi shtet në Ballkanin Perëndimor që ende nuk mund të lëvizë pa viza. Në këmbim të kësaj, Bashkimi Evropian kërkon veprime konkrete dhe të dukshme në luftimin e korrupsionit, krimit të organizuar dhe gjithashtu votimin e përcaktimit të kufirit me Malin e Zi.

Para tetë vjetësh, kur Shqipëria e Bosnja e Hercegovina nisën të lëvizin lirshëm, iu bashkuan të gjitha shteteve tjera që nuk iu duhen viza për udhëtime në zonën Schengen. Liderët, që udhëheqin Kosovën, nuk e kanë problemin e qytetarëve të tyre. Vizat i marrin lehtësisht e shumica prej tyre kanë vendosur të kenë shtetësi të Shqipërisë, privilegj të cilin nuk e kanë qytetarët e rëndomtë.

I fundit që është pajisur me pasaportë shqiptare është kryeministri Ramush Haradinaj.

Pasaportë shqiptare ka edhe presidenti i vendit, Hashim Thaçi, por sipas këshilltarëve të tij, që nuk kanë pranuar të flasin para kamerës, ai nuk e përdor atë.

Në Zyrën e kryetarit të Kuvendit, Kadri Veseli, ndërkaq kanë thënë se ai nuk pranon shtetësi tjetër, pos të Kosovës.