Ligjvënësit në Islandë do të marrin paga 9.000 euro

Ligjvënësit e zgjedhur në zgjedhjet e fundit parlamentare në Islandë do të marrin paga me 44 për qind rritje, duke fituar 9.000 euro në muaj, me të vetmin qëllim që të jenë “rezistentë” ndaj korrupsionit, tha komisioni përgjegjës për përcaktimin e pagave në sektorin publik.

Komisioni i përbërë nga pesë përfaqësues, tre të Parlamentit, një Gjykatës i Lartë dhe një nga Ministria e Financave, ka për detyrë të përcaktojë pagat e deputetëve, ministrave, gjyqtarëve dhe punonjësve të tjerë publikë të Islandës.

Autoritetet thanë se është e domosdoshme që deputetët të jenë të pavarur financiarisht në vend, i cili u godit nga kriza bankare në vitin 2008 dhe më vonë me skandalin e taksave të njohur si “Dokumentet Panama”.

Parlamenti i Islandës ka 63 deputetë, në një mandat katërvjeçar dhe nuk janë përfshirë punët që bëhen jashtë parlamentit, tha komisioni, përcjell albinfo.ch.