Lihtenshtajni organizon autobusa për të evituar marshimin e tifozëve shqiptarë!

Për të evituar tollovitë e mundshme, është hera e parë që në një ndeshje do të aktivizohet një “shuttlebus” për të bartur shikuesit. Autobusi do të qarkullojë në mes të Vaduzit dhe vendit ku është stadiumi

Në prag të ndeshjes që të enjten luhet në Vaduz në mes të Lichtenshtajnit dhe Shqipërisë, policia ka marrë masa shtesë për mbikëqyrjen  e situatës.

Nesër, kombëtarja e Lihtenshtajnit luan kundër Shqipërisë dhe me këtë rast pritet një dyndje e madhe e tifozëve të futbollit, shkruan gazeta  “Liechtensteiner Vaterland” e  principatës së vogël. Për këtë arsye, policia ka bërë përshtatjen e masave të sigurisë me situatën e pritshme.

Të gjitha vendet e stadiumit që zë 6000 shikues, tashmë janë shitur.

Federata e Futbollit e Lihtenshtajnit supozon se në stadium do të vijnë para së gjithash tifozë të Shqipërisë që jetojnë në shtetet në kufi me principatën (para së gjithash Zvicër, Austri).

Për të evituar tollovitë e mundshme, është hera e parë që në një ndeshje do të aktivizohet një “shuttlebus” për të bartur shikuesit, transmeton albinfo.ch. Autobusi do të qarkullojë në mes të Vaduzit dhe vendit ku është stadiumi. Ai do të fillojë qarkullimin e tij një orë e gjysmë para ndeshjes dhe do ta vazhdojë pastaj atë sërish, edhe një orë pas përfundimit të ndeshjes Lihtenshtajn – Shqipëri, duke bërë aq shkuarje-ardhje sa të ketë nevojë, përcjell albinfo.ch.

Po ashtu do të ketë më shumë se zakonisht prani policësh të uniformuar.