Të lihen anash kauzat politike kur është në pyetje sporti

Trajneri dhe udhëheqësi i klubit të xhudos “Ippon”, Driton Kuka, ka kërkuar që politika të lihet anash kur bëhet fjalë për sport, përcjell albinfo.ch.

Përmes një postimi në Facebook, ai ka reaguar pasi që Ligji për sponzorizim nuk u miratua në Parlament.

“Sot po nisemi në Lojërat Evropiane në Minsk 2019! Ekipi i përgatitur besoj se edhe kësaj radhe do të na gëzojë me medalje! Sporti, përkundër sukseseve, dje në Parlament nuk mori përkrahjen e duhur për t’u finalizuar Ligji për sponsorisim! S’e kemi merituar kështu aspak. Ju që s’e votuat, duhet të flisni publikisht arsyet tuaja, nese keni arsye të qëndrueshme, ne jemi gati të ulemi e ta diskutojmë, por… Leni kauzat politike kur është në pyetje sporti! Kryefjala e shtetësisë së Kosovës është sporti, e dini ju të gjithë kur takoheni me politikanë të huaj me çka lavdëroheni më së shumti”, ka shkruar Kuka në Facebook.

Majlinda Kelmendi, Akil Gjakova, Nora Gjakova, Distria Krasniqi dhe Loriana Kuka, janë në mesin e sportistëve të Kosovës që do të marrin pjesë  në Lojërat Europiane Minsk 2019.

LE Minsk 2019 do të mbahen gjatë datave 21-30 qershor në Bjellorusi.