Lista Serbe kërcënon, nga 1 qershori serbët do të reagojnë

FB: Lista Serbe

Lista Serbe ka filluar edhe një herë me kërcënimet. Pas betimit të kryetarit të ri të Mitrovicës së Veriut, Erden Atiq, këtë të premte, Lista Serbe ka mbajtur konferencë për media, ku ka kërcënuar me metoda kundërshtimi të kryetarëve të dalë nga zgjedhjet e 23 prillit.

Nënkryetari i Listës Serbe, Igor Simiq, është shprehur se pas 1 qershorit serbët do të reagojnë.

“Populli nuk mund ta tolerojë regjimin e Albin Kurtit. Ne japim një afat deri në 1 qershor për të ndaluar represionin e popullit dhe sekuestrimin e tokave dhe shpronësimet e rreme, arrestimet dhe aktakuzat e rreme. Të ndalet persekutimi, sepse nëpër kazamatet në Kosovë ka serbë të pafajshëm. Për të ndaluar mohimin e të drejtave themelore si trajtimi dhe arsimimi. Nëse këto veprime vazhdojnë, përgjigjja e popullit serb do të vijë më 1 qershor, ne do të mbrohemi me të gjitha mjetet”, tha Simiq, përcjell albinfo.ch.

Tutje ai ka shtuar se me marrjen e detyrës nga kryetarët e rinj të zgjedhur, po rritet regjimi i Kryeministrit Albin Kurti.

“Në fillim duam të theksojmë se me përpjekjet e Serbisë dhe të gjithë popullit arritëm të ruanim paqen dhe ta pengojmë popullin të reagojë ndaj regjimit të Albin Kurtit dhe me këtë ngjarje zyrtarisht filloi pushtimi i veriut të Kosovës. Por, ka një fillim dhe një fund. Do të përfundojë kur ta zgjidhin serbët. Theksoj se jemi të përkushtuar ndaj paqes. Paqja u ruajt me ftesë të Aleksandër Vuçiqit, veçanërisht për zgjedhjet. Fatkeqësisht, përveç Serbisë, Vuçiqit dhe popullit serb, nuk shohim se dikush dëshiron ta ruajë paqen. Megjithatë, durimit i ka ardhur fundi”, deklaroi ai, përcjell albinfo.ch.