Tematike

Luljeta nga Zvicra dëshiron të ndihmojë Amserën

Ka mbi dhjetë ditë që kontoja për Anserën është e hapur në Bankën Kantonale të Thurgaut

Luljeta Bislimi, një vajzë 21 vjeçare nga Kreuzlingeni (Thurgau) ka marrë një nismë interesante: të ndihmojë Amserën, vogëlushen e shpëtuar nga orteku në Restelicë. “Kur dëgjova për tragjedinë menjëherë mendova se si mund t`i ndihmohej kësaj vajze”. Ajo mori informata të mëtutjeshme, mori edhe këshilla nga shoqata Shqipëri-Zvicër, nga babai dhe nga rrethi i saj. Kështu, Luljeta tashmë kishte mbështetjen e mjaftueshme dhe konfirmimin.

“Fillimisht ndjehesha e pasigurt nëse do të merrem seriozisht nga njerëzit”, thotë ajo. Por, tashmë ka mbi dhjetë ditë që kontoja për Anserën është e hapur në Bankën Kantonale të Thurgaut, te e cila Luljeta ka gjetur përkrahje për synimin e saj.

Luljeta ka ardhur në Zvicër me familjen kur ka pasur katër vjet. Ajo i njeh rrethanat e atjeshme nga vizitat dhe nga rrëfimet, shkruan Thurgauer Zeitung . “Mbretërojnë kushte të rënda, ka shumë korrupsion, nuk ka sisteme të sigurisë sociale, shanset për arsim janë të këqija dhe për shumë njerëz edhe nevojat elementare paraqesin luks”. Për këtë arsye është me rëndësi që të vlerësohen gjërat dhe të ndahen me të tjerët.

Ajo planifikon që kontoja të qëndrojë e hapur deri në mesin e prillit. Kushdo që dëshiron të ndihmojë, mund të drejtohen në e-mailin [email protected] për të kërkuar një fletëpagesë. Informata për këtë nismë mund të gjenden edhe në grupin e facebook “Amsera- Be Part of It”. Luljeta shpreson që me angazhimin e saj të ndihmojë sadopak.

Për të qenë e sigurt se paratë do të shkojnë në vendin e duhur ajo planifikon që në një të ardhme të afërt të shkojë personalisht në Restelicë dhe t`i dorëzojë të hollat atje.