Lustenberger, kryetar i ri i Parlamentit

Shikuar nga ana formale e hierarkisë shtetërore, posti i kryetarit të Parlamentit në Zvicër konsiderohet si posti më i lartë, ndonëse nuk është post ekzekutiv

Dhoma Nacionale e Parlamentit të Zvicrës ka zgjedhur sot kryetarin e saj të ri. Me 175 vota pro, deputetët për dymbëdhjetë muajt e ardhshëm këtë post ia kanë besuar kolegut të tyre nga partia CVP/PDC, Ruedi Lustenberger nga Kantoni Luzern.

Gjatë njëzet viteve të fundit vetëm Hansjörg Walter nga SVP/UDC ishte zgjedhur me më shumë vota në këtë post. Kjo ka ndodhur në vitin 2011, kur për të kishin votuar 185 deputetë, shkruan azonline.ch.

Shikuar nga ana formale e hierarkisë shtetërore, posti i kryetarit të Parlamentit në Zvicër konsiderohet si posti më i lartë, ndonëse nuk është post ekzekutiv. Lustenberger gjatë një viti në vijim do të udhëheqë mbledhjet e parlamentit dhe do të udhëheqë delegacionet parlamentare në vizitat jashtë vendit. Ai është mjeshtër i zdrukthëtarisë me profesion ndërsa për disa vite ka qenë zëvendëskryetar i parlamentit.

Lustenberger zë vendin e Maya Graf nga partia e Gjelbër, e cila ka udhëhequr parlamentin gjatë 12 muajve të kaluar. Ajo ka qenë kryetarja e parë e ardhur nga Partia e Gjelbër. Në përgjithësi, kryetarët zgjidhen nga katër partitë kryesore, vetëm përjashtimisht ka ndodhur disa herë që edhe partitë e vogla, (si të gjelbrit) të japin kryetarin.

Kryetari i ri është 63 vjeç, i martuar dhe baba i pesë fëmijëve të rritur. Në Dhomën Nacionale të Parlamentit bën pjesë nga viti 1999.