LVV propozon Albin Kurtin për mandat të ri si kryeministër të Kosovës

Foto: Albin Kurti

Lëvizja Vetëvendosje (LVV) ka konfirmuar mbështetjen e saj për kryetarin e partisë, Albin Kurtin, duke e propozuar atë për një mandat të ri në krye të Qeverisë së Kosovës. Vendimi është marrë me votë unanime gjatë mbledhjes së 59-të të Këshillit të Përgjithshëm të subjektit politik, bëjnë të ditur mediat në Prishtinë, përcjell albinfo.ch.

Në zgjedhjet e parakohshme parlamentare të mbajtura më 9 shkurt, LVV doli forca e parë politike duke fituar 48 ulëse në Kuvend, por pa arritur shumicën e nevojshme për të formuar e vetme qeverinë e re.

Ky hap i LVV-së vjen vetëm disa ditë pas vendimit të Gjykatës Kushtetuese, e cila vendosi një masë të përkohshme që u ndalon deputetëve të ndërmarrin veprime për krijimin e institucioneve të reja deri më 30 shtator. Ky vendim është kritikuar nga LVV, e cila ka theksuar nevojën për të mos e bllokuar procesin e formimit të qeverisë dhe për të ecur përpara me konstituimin e institucioneve.