Mafia shqiptare blen drogë kolumbiane

Radioja kolumbiane “Caracol” në versionin online ua ka kushtuar një shkrim ngjarjeve të fundit me sekuestrimin e kokainës nga ky vend dhe arrestimin e shqiptarëve. Ajo shkrimin e ka titulluar “Mafia e rrezikshme shqiptare që ble drogë kolumbiane”, duke thënë se tashmë një rast i ri NarcoJet, një ton kokainë kapur në Spanjë që ishte nisur nga Kolumbia, zbuloi një klient të ri për trafikantët kolumbianë.

Ajo shkruan për megaoperacionin në Spanjë, mes të cilëve u arrestuan edhe dy shqiptarë. Radio Caracol ka mësuar rreth raportit të Interpolit, ku jepet me detaje rrezikshmëria e këtij grupi trafikantësh që marrin drogë në Evropë.

“Shumë nga anëtarët morën pjesë në luftën e Ballkanit dhe për këtë arsye ata veprojnë me profesionalizëm ushtarak dhe dallohen për brutalitetin dhe efektivitetin e tyre”, citon Caracol raportin, përcjell TCH.

Në raportin e Interpolit shpjegohet se ish-ushtarët fitojnë besnikërinë e komuniteteve të tyre dhe anëtarëve të tyre nëpërmjet kontrollit ekonomik dhe kërcënimit për sigurinë e tyre.

“Duhet të theksohet se këto grupe kriminale në vendet e Evropës Lindore janë karakterizuar nga rruga e tyre e punës, bazuar në besnikërinë e anëtarëve të saj, të cilat arrijnë të kontrollojnë familjet e tyre në Shqipëri me lekë për t’i mbajtur ata, por në të njëjtën kohë për t’i kthyer në pengje, duke arritur të zgjerojnë lidhjet e tyre në të gjithë Evropën”, thuhet më tej, përcjell albinfo.ch.

Informacioni i këtyre grupeve është tashmë në duart e autoriteteve në pesë vende, të gjithë të interesuar për të frenuar trafikimin e drogës dhe për të kapur ish-ushtarët.