Majko takohet me komunitetin shqiptar në Amerikë

Pandeli Majko ndalesën e parë e bëri në Miçigan, ku edhe jeton një numër i madh i shqiptarëve

Ministri i Diasporës për Shqipërinë, Pandeli Majko, ka nisur të shtunën një vizitë disa ditore në Shtetet e Bashkuara të Amerikës.

Majko ndalesën e parë e bëri në Miçigan, ku edhe jeton një numër i madh i shqiptarëve, përcjell albinfo.ch.

Majko, i shoqëruar nga Ambasadorja e Shqipërisë në SHBA, Floreta Faber, Konsulli i Nderit, Ekrem Bardha dhe përfaqësues të tjerë të diasporës atje, vizitoi qendrat fetare të komunitetit shqiptar në Rochester Hills.

Pandeli Majko pa nga afër Kishën Katolike të Shën Palit, e cila në çdo cep të saj kishte gjurmë shqiptare. Ndërsa famulltari i Kishës Dom Fred Kalaj i tregonte ambientet e mbushura me simbole e figura shqiptare, si Nënë Tereza dhe Skënderbeu, ministri Majko tha se bëhej fjalë për një lidhje shumë të bukur mes besimit dhe ndjenjës kombëtare.

Më pas, Majko vizitoi Teqen e Baba Rexhepit, e para Teqe Bektashiane e hapur në SHBA. Në Teqen, ku gjithashtu simbolet fetare ndërthureshin me ato kombëtare, Majko u prit nga përfaqësues të komunitetit Bektashian dhe Dervishi Eliton Pashaj. Në fokus të diskutimeve ishte ruajtja e gjuhës shqipe tek brezat e rinj. Majko shprehu gatishmërinë për t’u angazhuar për sigurimin e librave të gjuhës shqipe për shqiptarët atje dhe regjistrimin e fëmijëve të lindur jashtë vendit.

Vizitat në qendrat fetare të shqiptarëve në Miçigan, Ministri Majko i mbylli në Qendrën Islamike Shqiptare, ku u takua me përfaqësues të këtij komuniteti dhe Imamin Shuaip Gerguri. Gjatë takimit Majko informoi të pranishmit lidhur me hapat që po ndërmerr bashkë me qeverinë, për krijimin e lehtësirave për shqiptarët e diasporës.