Makolli takon mërgimtarët që jetojnë në Francë

Makolli: Qëllimi i Ministrisë së Diasporës është përkujdesja institucionale ndaj mërgatës

Ministri i Diasporës, Ibrahim Makolli i ka njoftuar ata me objektivat që ka Ministria e Diasporës, duke përmendur ndër tjera, organizimin e mësimit plotësues në gjuhën amtare për fëmijët e mërgimtarëve, pastaj mbështetja e aktiviteteve kulturore në diasporë, që sipas Makollit ndikojnë shumë në ruajtjen e identitetet kombëtar, e objektiva tjera  që do të parashihen edhe me ligjin për diasporë që pritet të miratohet së shpejti.

 “Ne nuk jemi të kënaqur me  numrin e fëmijëve tanë që vijojnë mësimin plotësues në gjuhën amtare. Sipas statistikave që kemi janë vetëm rreth 4 për qind e fëmijëve tanë në diasporë që vijojnë mësimin plotësues. Ky numër i vogël paraqet rrezik të shkrirjes së gjeneratave të reja. Kësisoj, ne i ftojmë prindërit që t’i dërgojnë fëmijët e tyre në mësimin plotësues në gjuhën amtare”, ka deklaruar Makolli. 

Ai i ka inkurajuar mërgimtarët që të integrohen suksesshëm në shoqëritë ku ata jetojnë, duke përmendur sukseset që shumë prej tyre po i arrijnë në fusha të ndryshme akademike, shkencore, politike, artistike e sportive. 

Gjithashtu Makolli, ka ftuar mërgimtarët që të investojnë në Kosovë, duke theksuar se tani janë krijuar kushtet e mira për të hapur bizneset e tyre në atdhe, dhe shtoi se Qeveria e Kosovës çdo ditë e më shumë po krijon hapësirë ligjore e infrastrukturë që garantojnë investim të sigurt. 

Pjesëtarët e diasporës që ishin të pranishëm në këtë takim janë shprehur të kënaqur me krijimin e Ministrisë së Diasporës, dhe përgëzuan institucionet e vendit që kanë ngritur  nivelin e përkujdesjes shtetërore ndaj qytetarëve tanë që jetojnë në vende të ndryshme të botës. 

Në këtë takim të Ministrit të Diasporës, Ibrahim Makolli, me mërgimtarët tanë që jetojnë në Francë ishte i pranishëm edhe Ambasadori i Republikës së Kosovës në Paris, Muhamedin Kullashi.