Maqedoni: Edhe 14 ditë vazhdon gjendja e jashtëzakonshme

Pas konsultimeve me ekspertët e shumë fushave, edhe disa ditë do të vazhdojë gjendja e jashtëzakonshme.

Duke filluar nga 17 maji, gjendja e jashtëzakonshme në Maqedonin e Veriut do të vazhdojë edhe për 14 ditë të tjera, ka bërë të ditur presidenti i vendit, Stevo Pendarovski, pas mbledhjes së Këshillit të Sigurisë Kombëtare, njofton albinfo.ch.

“Në mbledhje kryeministri Spasovski referoi për 30 ditët e fundit dhe shpjegoi kërkesën e qeverisë për shpalljen e sërishme të gjendjes së jashtëzakonshme për 30 ditë. Pas konsultimeve që kam pasur ditëve të fundit me ekspertët e shumë fushave dhe me këshilltarët në Kabinet, si dhe rreth asaj çfarë u tha në seancë, kam vendosur të shpall gjendje të re të jashtëzakonshme që do të zgjasë vetëm 14 ditë”, pohoi presidenti Pendarovski./albinfo.ch

---