Maqedoni: Pas çmimit fiks për bukën, priten çmime fikse për produkte të tjera

Në Maqedoninë e Veriut është paralajmëruar ngrirje e çmimeve të produkteve të shportës ushqimore.

Ministri i Ekonomisë, Kreshnik Bekteshi, bashkë me kryeministrin Dimitar Kovaçevski me një fotografi të publikuar kanë treguar se do të ketë caktim të çmimit edhe për produktet e tjera, shkruan RTV 21, përcjell albinfo.ch.

“Të gjitha produktet janë të listuara në vendimin e Qeverisë për ngrirjen e marzhës për tregti ose marzhës përfituese si njihet në masën e gjerë”, është shprehur Bekteshi, teksa shton se të gjitha do të analizohen.

Kjo ka nxitur edhe reagimet e partive kundërshtare në vend. Kreu i VMRO-DPMNE-së, Hristijan Mickovski, këtë tentativë të LSDM-së e quajti vetëm si një masë për marketing politik. “Me këtë masë po bëjnë piar nëpër markete me dy bukë në duar, dhe në vend që kryeministri dhe ministrat e tjerë në vend t’i zgjidhin problemet, ato e shtyjnë Maqedoninë në një errësirë ekonomike”, ka deklaruar Mickovski.

Me vendim të Qeverisë në Maqedoni buka e bardhë shitet nëpër të gjitha dyqanet për 33 denarë.

---