Maqedonia e Veriut ndalon importin e mishit nga Serbia

Shkak murtaja afrikane

Agjencia maqedonase për Ushqimin dhe Veterinarinë (AUV) ka ndaluar importin e mishit të derrit dhe nënprodukteve të tij nga Serbia si edhe importin dhe tranzitin e derrave të butë dhe të egër nga i njëjti vend, pas njoftimeve se atje ishte shfaqur murtaja afrikane.

Drejtori i AUV-it, Zoran Atanasovski deklaroi se në Serbi ka rënë murtaja afrikane e derrit në rrethinat e Beogradit, Mlladenovacit dhe krahinës së Semedervës.

”Situata po përcillet me vëmendje, ndërsa masat parandaluese janë ngritur në nivelin maksimal”, tha ai duke shtuar se në Republikën e Maqedonisë së Veriut nuk ka murtajë afrikane të derrit.

Alarmi për murtajën afrikane të derrave u dha pas informacioneve se në Bullgari numri i këtyre vatrave është rritur shkruajnë mediat maqedonase, përcjell Albinfo.ch.

---