Maqedonia ndër më të ndoturat në Evropë, ajri ende larg standardeve të sigurisë

Një raport i fundit mbi cilësinë e ajrit e rendit Maqedoninë ndër vendet më të ndotura në Evropë, duke u bazuar në nivelin e grimcave PM2.5. Edhe pse ka një përmirësim krahasuar me vitet e kaluara, ndotja mbetet ende shumë mbi kufijtë e rekomanduar nga Organizata Botërore e Shëndetësisë.

Sipas raportit të IQAir për vitin 2025, Maqedonia zë vendin e dytë në Evropë dhe të 34-in në botë për ndotjen e ajrit. Niveli mesatar vjetor i PM2.5 arriti në 21.2 mikrogramë për metër kub, shumë më i lartë se kufiri i rekomanduar prej 5 mikrogramësh.

Qytetet më të prekura nga ndotja janë Tetova dhe Strumica, ndërsa në listë renditen gjithashtu edhe Gostivari, Kërçova dhe Kumanova. Edhe në Shkup, megjithëse me nivel pak më të ulët, ajri mbetet larg standardeve të sigurta për shëndetin.

Raporti thekson se, ndonëse niveli i ndotjes ka rënë në krahasim me vitet e fundit dhe është në pikën më të ulët të tetë viteve të fundit, kjo nuk do të thotë se situata është e kënaqshme. Ajri vazhdon të jetë i dëmshëm dhe mbi normat e lejuara.

Në nivel global, vetëm një pjesë e vogël e qyteteve arrijnë të përmbushin standardet e OBSH-së për cilësinë e ajrit. Të dhënat janë mbledhur nga mijëra stacione monitorimi në mbarë botën.

Ndotja e ajrit nuk është vetëm problem mjedisor, por edhe rrezik serioz për shëndetin. Ajo lidhet me sëmundje të zemrës, goditje në tru, kancer dhe prek veçanërisht fëmijët.

Ekspertët theksojnë se përmirësimet e vogla nuk duhet të krijojnë vetëkënaqësi. Edhe pse ka progres, ai nuk është i mjaftueshëm për të garantuar ajër të pastër dhe të sigurt për qytetarët.

Muajt e dimrit mbeten më problematikët për ndotjen, ndërsa pranvera sjell përmirësim të përkohshëm. Kjo tregon nevojën për masa afatgjata dhe jo vetëm sezonale për përballimin e këtij problemi.