Masa shtesë për sezonin turistik

"Do të ketë përcaktim të zonave ku lejohet përdorimi i motorëve të ujit, oraret e përdorimit të tyre etj."

Autoritetet e sigurisë në Shqipëri kanë marrë masat për të përballuar fluksin e turistëve në Shqipëri.

Përveç organeve të qeverisjes vendëse, policive bashkiake, Inspektoratit të mjedisit, do të ofrohen edhe komisariatet e policisë së ndërhyrjes së shpejtë, thanë zyrtarë policorë në Tiranë.

Një ndër masat më të rrepta, sipas policisë, do të jetë lëvizja e mjeteve ujore.

“Do të ketë përcaktim të zonave ku lejohet përdorimi i motorëve të ujit, oraret e përdorimit të tyre, përcaktimin e vendeve të posaçme dhe shenjave dalluese, nëpërmjet të cilave tregohen korridoret e hyrje-daljeve të këtyre mjeteve në det, si dhe distancat e ushtrimit të lundrimit, përcaktimi i distancave jo më e vogël se 100-300 metra dhe jo më larg se 1 milje nga bregu”, thanë zyrtarët policorë.

Policia tha se ka marrë masa edhe për goditjen e veprimtarive kriminale në zonat turistike, si edhe për stabilizimin e qarkullimit rrugor.