Masakër në Fier; vret katër familjarë dhe vetën

Një vrasje makabre ka ndodhur në rajonin e Fierit në Shqipëri. Një burrë 73 vjeç ka vrarë dy vëllezërit e tij, kunatën dhe mbesën. Në fund ka vrarë edhe vetën

Vrasje e pesëfishtë ka ndodhur në fshatin Sukë të Fierit, ku një burrë 73 vjeçar ka vrarë dy vëllezërit e tij, kunatën dhe mbesën, ndërsa i ka dhënë fund jetës së tij. Kjo vrasje makabre ka shqetësuar opinionin në Shqipëri, por edhe në rajon.

Tre prej viktimave janë identifikuar si Xhemal Vrapi, Besim Vrapi dhe Bajram Vrapi 73 vjeç. Ky i fundit është i dyshuar si autori i krimit, ndërsa Policia shqiptare është në vendin e ngjarjes për të bërë hetimet e detajuara.

Siç raportojnë mediet në Tiranë, i dyshuari si autor i vrasjes së pesëfishtë, ka shkuar në banesën e vëllait të tij Xhemal Vrapi, ku me një armë zjarri ka ekzekutuar atë, vëllanë tjetër Besim Vrapin, kunatën dhe mbesën 17 vjeçare.

Pas kësaj është larguar nga banesa, por i rrethuar nga policia në një arë të mbjellë me misër i ka dhënë fund edhe jetës. Nuk dihen ende detajet e kësaj ngjarje të ndodhur gjatë mëngjesit të sotëm, ndërsa ajo që është shqetësuese është fakti se dhuna familjare në Shqipëri është në rritje.

Një ngjarje e tillë ka ndodhur në janar të këtij viti në rajonin e Korçës, ku për çështje xhelozie një burrë ka ekzekutuar katër persona, dy çift bashkëshortësh, të afërmit të vrasësit.