Mavraj: Maksimumin kundër Francës

“Formacioni nuk zgjidhet në bazë të dëshirave të mia, nuk ka rëndësi nëse do të luajë Ajeti apo Kukeli, për këtë gjë vendos De Biasi”, u shpreh Mavraj

Mbrojtësi i Kombëtares shqiptare, Mërgim Mavraj ka premtuar angazhim maksimal për ndeshjen e dytë të grupit ndaj Francës, duke thënë se do të dëshmojmë që forca e skuadrës është grupi dhe mungesa e Lorik Canës nuk do të ndihet, shkruan albinfo.ch.

“Cana është kapiteni ynë, lojtar shumë i rëndësishëm. Por forca jonë është grupi dhe ne do të japim maksimumin që mungesa e Canës të mos ndihet. Ne e treguam edhe me Zvicrën që mund t’ia dalim”, u shpreh Mavraj.

“Formacioni nuk zgjidhet në bazë të dëshirave të mija, nuk ka rëndësi nëse do të luajë Ajeti apo Kukeli, për këtë gjë vendos De Biasi. Madje, unë nuk e di nëse do luaj vetë, pasi kemi shumë alternativa”, tha ai.

Elseid Hysaj pritet të marrë shiritin e kapitenit për herë të parë në një ndeshje zyrtare. Në miqësoren ndaj Katarit, ai u bë kapiteni më i ri në histori të kombëtares, por rritja e tij si lojtar ka bërë që të etiketohet si pasardhës i denjë i Canës dhe këtë pritet ta dëshmojë të mërkurën ndaj Francës.

“Shiriti i kapitenit është i rëndësishëm për mua, është po ashtu është edhe kënaqësi e madhe, por që kërkon më shumë përgjegjësi si lojtar në fushë por edhe si njeri”, u shpreh mbrojtësi i Napolit.

Mirëpo, shkodrani thotë se De Basi ende nuk ka vendosur se kujt do t’i besohet shiriti, edhe pse Cana, pasi u ndëshkua me të kuq, ia dha atij. Por, ai siguron se do të japë gjithmonë maksimumin në fushë.

“Ende nuk e di nëse do jem kapiten, por ajo që di është fakti se do të jap maksimumin për skuadrën dhe do të mundohemi që të qëndrojë sa më gjatë në Francë”, tha ai.