Mbledhja e parë e Grupit të Miqësisë Austri-Shqipëri

Është bërë e ditur se nën drejtimin e kryetares së Grupit të Miqësisë Austri-Shqipëri në Parlamentin e Austrisë,  zj. Ewa Ernst-Dziedzic, u zhvillua sot në ambientet e Parlamentit të Austrisë mbledhja e konstituimit të Grupit të Miqësisë, transmeton albinfo.ch.

Ishin të ftuar dhe morën pjesë Ambasadori i Shqipërisë në Vjenë, z. Roland Bimo, si dhe në lidhje on-line, Ambasadori i Austrisë në Tiranë, z. Christian Steiner.

Në takim morën pjesë edhe deputetët në Parlamentin e Austrisë, z. Fridrich Ofenauer dhe Laurenz Poetinger nga Partia Popullore, z. Christian Ries nga Partia e Lirisë dhe z. Rudolf Kaske nga Partia Social-Demokrate e Austrisë.

Pas fjalës së mirëserdhjes dhe konstituimit zyrtar të Grupit nga ana e kryetares zj. Ewa Ernst-Dziedzic, përshëndetën ambasadorët Roland Bimo dhe Christian Steiner.

Kryetarja dhe anëtarët e Grupit shprehën angazhimin e tyre për thellimin më tej të marrëdhënieve midis të dy vendeve në ato fusha, të cilat kanë ndikim të drejtpërdrejtë në zhvillimin e Shqipërisë, siç është edukimi profesional i brezit të ri, çështjet e sigurisë, përfshirë migracionin ilegal, fuqizimi i shkëmbimeve ekonomike dhe thellimi më tej i bashkëpunimit shumë të suksesshëm në fushën e kulturës.