evente

Mbrëmja AlbGala e platformës mediale albinfo.ch, një përjetim i paharrueshëm

E diel, 1 Dhjetor 2024 - 23:39 albinfo.ch

Në një atmosferë solemne, me ambient të ngrohtë e miqësor, platforma mediale Albinfo.ch ka mbajtur mbrëmë në Cyrih mbrëmjen AlbGala të fundvitit.

Aktivitetin e kanë nderuar me pjesëmarrjen e tyre edhe krerët e përfaqësive diplomatike nga hapësirat shqiptare, pastaj politikanë shqiptaro-zviceranë si dhe shumë aktivistë kulturorë, shoqërorë e sportivë, shqiptarë e zviceranë.

Drejtori i platformës albinfo.ch, Sevdail Tahiri

Kanë marrë pjesë edhe një numër i njerëzve nga biznesi, partnerë afaristë të Albinfo.ch, të cilët kanë merita të mëdha për mbarëvajtjen e platformës. Në këtë mbrëmje, siç është bërë tashmë traditë, janë ndarë edhe çmimet për Personalitetin e Vitit 2024, në gjashtë fusha të ndryshme, të cilët me arritjet e tyre kanë shënuar vitin 2024 në komunitetin shqiptar të Zvicrës.

Dr. Bashkim Iseni, themelues i albinfo.ch.

Kështu, çmimin për angazhim shoqëror dhe humanizëm e ka merituar veprimtarja e njohur humaniste nga Cyrihu, Valdete Hoti.

Veprimtarja e njohur humaniste nga Cyrihu, Valdete Hoti, duke pranuar cmimin nga Ambasadori i Kosovës në Zvicër, Mentor Latifi

Për politikë, Florian Haçkaj, veprimtar dhe afarist, ndërsa për Sport, Albinfo.ch ka vlerësuar me çmimin përkatës arbitrin e njohur të niveleve ndërkombëtare, Bekim Zogaj.

Arbitri i njohur i niveleve ndërkombëtare, Bekim Zogaj

Personalitet i Vitit 2024 për sektorin e biznesit është zgjedhur afaristi i njohur nga Zvicra frankofone, pronari i kompanisë Greenhouse, Nazmi Mehmetaj.

Pronari i kompanisë Greenhouse, Nazmi Mehmetaj, duke pranuar çmimin nga Gzim Hasani smzh AG, i cili është shpallur CEO më me ndikim i vitit 2024

Për kulturë, gjegjësisht për muzikë, çmimi ka shkuar në duart e këngëtarit të suksesshëm të muzikës rap, Arbër Rama (EAZ).

Arbër Rama (EAZ), duke pranuar çmimin nga Shkodran Osmanaj, , i cili prej kohësh koncerton me disa prej orkestrave më në zë në Zvicër

Personaliteti i Vitit 2024 për mjekësi është shpallur mjeku i shquar, neurokirurgu dhe profesori universitar, Edin Nevzati.

Nëna e neurokirurgut dhe profesorit universitar, Edin Nevzati, duke pranuar çmimin nga Heinrich Meister, CEO dhe President i Shkollës Benedict

Kjo mbrëmje është udhëhequr nga moderatori i mirënjohur nga Kosova, Berat Miftari, i cili ka madhështuar këtë mbrëmje gala.

Për atmosferë të këndshme të mbrëmjes janë kujdesur pianistja Kristina Martini si dhe Florent Abrashi me bendin e vet, të ardhur nga Prishtina.

Aktiviteti është mbajtur në ambientet e restorantit modern Letzigrund të vëllezërve Kqira në Cyrih, të cilët kanë mirëpritur dhe gostitur me profesionalizëm dhe me ushqime të përgatitura e të shërbyera me dashuri.