“Mbretëresha Elizabetë” vendoset në Has – mbi 80 për qind e hasjanëve jetojnë “falë” Anglisë

Aktualisht çdo familje hasjane ka 1 ose më shumë pjesëtarë të vet në Britani të Madhe.

Statuja e Mbretëreshës Elizabetë të Anglisë do të vendoset në sheshin e qytetit të Hasit në Shqipëri. Një vendim i tillë po ndërmerret në shenjë respekti ndaj mbretëreshës së vendit ku çdo familje ka më shumë se dy emigrantë në Angli.

Kryetari i bashkisë së Hasit, Liman Morina tha në një intervistë për Euronews se ky vendim u mor për të shprehur mirënjohjen ndaj Mbretërisë së Bashkuar që siç theksoi është i vetmi burim mbijetese për hasjanët, përcjell Albinfo.ch.

Prej më shumë se 6 vjetësh, sipas Morinës, Hasi është lënë në harresë të plotë nga qeveria dhe kjo ka bërë që shumë të rinj dhe jo vetëm, të largohen, kryesisht drejt Britanisë së Madhe.

Morina tha se aktualisht çdo familje hasjane ka 1 ose më shumë pjesëtarë të vet në këtë shtet.

“Mbi 80 për qind e hasjanëve mbijetojnë falë ndihmës që vjen nga Mbretëria e Bashkuar. Çdo familje ka një person në Angli. Aktualisht edhe të punësuarit duan të ikin, pasi rrogat janë minimale. Muajt e fundit ka një trend shumë të lartë largimesh”, thotë kryebashkiaku Morina./Albinfo.ch/

---