Më së shumti azilkërkues, nga Serbia

Nnga Serbia, në Luksemburg kanë kërkuar azil 765 veta, nga Maqedonia 380 dhe nga Kosova, 130 veta

Numri i kërkuesve të azilit në Luksemburg po shkon duke u rritur me të madhe. Kështu, përderisa në vitin 2007 në këtë vend të vogël të Beneluksit, azil kishin kërkuar vetëm 426 veta, vetëm në dhjetë muajt e këtij viti tashmë janë regjistruar 1807 sish.

Më së shumti azilkërkues vijnë nga Serbia, gjithsej 765 veta, shkruan tageblatt.lu.

Shtetasit e Maqedonisë zënë vendin e dytë me 380 ndërsa kosovarët që kanë provuar fatin në Luksemburg janë gjithsej 130 dhe zënë vendin e tretë. Lista vazhdon me shtetasit e shteteve tjera të ish Jugosllavisë. Malazezët, që janë 69 veta, zënë vendin e katërt ndërsa boshnjakët të pestin, me 45 azilkërkues. Pas tyre vijnë tunizianët, rusët, algjerianët etj.

Nga 1807 kërkesat për azil këtë vit, janë përpunuar 1058 raste. Azili u është njohur vetëm 36 personave, 9 veta kanë marrë të drejtën e kufizuar të qëndrimit në këtë vend dhe 547 kërkesa janë refuzuar.

Nga të refuzuarit, 313 janë kther në vendet prej nga kanë ardhur, 19 prej tyre me dhunë ndërsa 294 veta të tjerë janë kthyer vullnetarisht. Ndër 313 të kthyerit 177 veta kanüe qenë nga Serbia, 62 nga Kosova dhe 30 nga Maqedonia.