Merkel: BE-ja është në krizë

Në samitin e BE-së po diskutohet nevoja e rivendosjes së besimit të votuesve për BE-në pas vendimit të britanikëve që të lënë bllokun

Kancelarja gjermane Angela Merkel dje në samitin e BE-së në Bratislavë, tha se Bashkimi Evropian është në “gjendje kritike”.

„Ne kemi nevojë për zgjidhje për BE-në, dhe ne jemi në një gjendje kritike. Jo të gjitha problemet mund të zgjidhen me një takim të vetëm, kështu që puna që mund ta bëhet më së miri tash është të rregullohet siguria, në luftën kundër terrorizmit dhe në sektorin e mbrojtjes“, tha Merkel.

Në samitin e BE-së në kryeqytetin e Sllovakisë po diskutohet nevoja e rivendosjes së besimit të votuesve për Bashkimin Evropian pas vendimit të britanikëve që të lënë bllokun.

Ky është samiti i parë pa pjesëmarrjen e Britanisë së Madhe pas marrjes së vendimit për Brexit.

Sipas kancelares gjermane, udhëheqësit e bllokut duhet të tregojnë se ata mund të promovojnë sigurinë e përbashkët, bashkëpunimin në fushën e mbrojtjes dhe të ekonomisë.

Tema kryesore e Samitit, megjithatë janë emigrantët dhe refugjatët, në lidhje me çfarë dallimet janë më të mëdha. Qeveritë populiste në Evropën Qendrore kanë kundërshtuar rialokimin e kuotave të refugjatëve.

Ministri i Jashtëm i Luksemburgut Zhan Aselborn pak ditë më parë i kërkoi BE-së të pezullojë anëtarësimin e Hungarisë në BE, për shkak se, sipas tij, Budapesti shkel vlerat themelore që përforcojnë Bashkimin.