Meta: Provimi ynë i qershorit të ardhshëm shumë i vështirë

Presidenti i Shqipërisë, Ilir Meta, deklaroi se konkluzionet e Këshillit për Çështjet e Përgjithshme për negociatat e anëtarësimit të Shqipërisë me Bashkimin Evropian duhen mirëpritur me realizëm dhe përgjegjshmëri, përcjell albinfo.ch.

Në një deklaratë për mediat, Meta tha se: “Ne të gjithë duhet ta vlerësojmë dhe çmojmë vullnetin pozitiv me të cilin si Komisioni Evropian ashtu edhe të gjitha vendet anëtare, e mirëpresin procesin e integrimit të Shqipërisë dhe gjithë rajonit në BE”.

Ai shtoi se kjo qasje duhet ta nxisë klasën politike për një lexim të drejtë dhe realist të sfidave serioze që ka përpara, veçanërisht në fushën e sundimit të ligjit.

“Një vit kalon shpejt, ashtu si nga dje kaloi një ditë. Provimi ynë i qershorit të ardhshëm do të jetë shumë i vështirë e kërkues pasi edhe vetë Bashkimi Evropian do të ketë provimin e tij zgjedhor në të njëjtën kohë”, përfundoi ai.