Microsoft investon 400 milionë dollarë në Zvicër për teknologji cloud dhe inteligjencë artificiale

Keystone EPA/MARK R. CRISTINO

Microsoft ka njoftuar një investim strategjik prej 400 milionë dollarësh amerikanë (rreth 326 milionë franga zvicerane) në Zvicër, duke e pozicionuar vendin si një qendër kyçe për zhvillimin e teknologjisë cloud dhe inteligjencës artificiale (AI) në Evropë.

Në kuadër të këtij investimi, Microsoft do të zgjerojë qendrat ekzistuese të të dhënave në rajonet e Gjenevës dhe Cyrihut, të cilat janë funksionale që nga viti 2019. Investimi përfshin pajisje të reja me procesorë grafikë të avancuar për të përmbushur kërkesën në rritje për shërbime cloud dhe kapacitet të lartë për AI.

Një komponent thelbësor i këtij projekti është promovimi i edukimit dhe trajnimeve në fushën e inteligjencës artificiale. Microsoft synon që deri në fund të vitit 2027, një milion qytetarë zviceranë të kenë ndjekur trajnime në fushën e AI. Ky objektiv do të arrihet përmes platformave të dedikuara si AI-Fitness.ch dhe LerneKI.ch, si dhe mbështetjes për programe të specializuara për studentët dhe punonjësit në zhvillim profesional, transmeton albinfo.ch.

Gjigandi teknologjik planifikon gjithashtu të forcojë bashkëpunimin me startup-e dhe ndërmarrje të vogla e të mesme (SME) në Zvicër, duke punuar në partneritet me rrjetin kombëtar të parqeve të inovacionit. Ky bashkëpunim synon të shpejtojë kalimin nga kërkimi shkencor drejt aplikimeve tregtare.

Në kuadër të këtij investimi, Microsoft riafirmon angazhimin e tij për mbrojtjen e privatësisë dhe sigurinë e të dhënave për përdoruesit evropianë, përfshirë ata zviceranë. Po ashtu, kompania synon të forcojë bashkëpunimin me organizata ndërkombëtare dhe agjenci të OKB-së me bazë në Gjenevë, për të avancuar dialogun politik në lidhje me teknologjitë e reja.

Kjo nismë është pjesë e një plani më të gjerë të Microsoft për të rritur kapacitetet e qendrave të të dhënave në të gjithë Evropën me 40% gjatë dy viteve të ardhshme.