Mijëra persona “kosovarë me letra”

Shumë emigrantë që janë deklaruar si kosovarë dhe kanë marrë paligjshëm dokumente në kohën e UNMIK-ut, po humbin leje-qëndrimin apo të drejtën e vizës.

Ministria e Punëve të Brendshme e Kosovës po verifikon vërtetësinë e dokumenteve të tyre, duke mos lejuar t’i marrin të rejat, raporton Radio Kosova.

Edhe pse nuk ka të shifra të sakta, sipas të dhënave të Ministrisë së Punëve të Brendshme llogaritet se janë mijëra raste të tilla të vërtetësia e të cilave po kontestohet.

Drejtori i Agjencisë kosovare për regjistrim civil, Shkumbin Kastrati i ka thënë Radio Kosovës se ekziston dyshimi se në numrin mbi 450 mijë letërnjoftime të pa ndërruara të UNMIK-ut një pjesë e tyre mund t’i përkasin kësaj kategorie.

Kurse, shef i Departamentit për Shtetësi, Azil dhe Migracion, Islam Caka, ka deklaruar se autoritetet kosovare po verifikojnë të gjitha rastet kur shtete të ndryshme kërkojnë vërtetësinë e tyre.

Marrja e dokumenteve kosovare nga shtetas kryesisht të vendeve fqinjë konsiderohet se është bërë gjatë vitit 1999, kur UNMIK-u kishte filluar regjistrimin dhe kur mungonin librat amëz.

Në saje të kësaj persona të etniteteve të ndryshme kanë kërkuar dhe marr lejen e qëndrimin apo kanë fituar shtetësinë në vende të ndryshme.

Duke u paraqitur si kosovarë ata kanë arritur të bindin autoritet e emigracionit të shumë vendeve se kanë ikur nga represioni në Kosovë.