Tensione në konferencën mes ministrit gjerman të Mbrojtjes dhe presidentit të Serbisë

Ministri gjerman i Mbrojtjes, Boris Pistorius, pas vizitës në Kosovë, qëndroi sot në Beograd, ku u takua me presidentin serb, Aleksandër Vuçiq.

Mediat serbe raportojnë për tensione në konferencën për media në pjesën kur Vuçiq e ka pyetur ministrin gjerman se në bazë të cilit akt juridik ndërkombëtar Gjermania po e armatos Kosovën.

Pistorius është përgjigjur, duke thënë se Gjermania nuk po e armatos vetëm Kosovën, por edhe Serbinë.

“Gjermania po armatos jo vetëm Kosovën, por edhe Serbinë, e furnizon me armë për të forcuar kapacitetet mbrojtëse të secilit shtet. Ne nuk furnizojmë me armë sulmuese, vetëm mbrojtëse. Nga këndvështrimi ynë, ne e njohëm Kosovën. Vendet e tjera nuk e kanë bërë këtë, bëhet fjalë për një numër më të vogël vendesh në botë. Synimi ynë në rajon është paqja dhe stabiliteti, si dhe afrimi i përbashkët me BE-në. Kushtet e fqinjësisë së mirë janë të rëndësishme këtu, me të dyja palët e përfshira, dhe ky është parakushti bazë për stabilitet. Asgjë nuk e ndryshon këtë fakt”, u përgjigj Pistorius.

“Është e rëndësishme dhe është e nevojshme për Serbinë që të vazhdojë të hetojë ngjarjet e 24 shtatorit, dhe kjo është e një rëndësie vendimtare”, tha Pistorius.