Ministrja Hajdari mori pjesë në hapjen e seancës plenare të Sekretariatit të Përgjithshëm të EFTA

Ministrja e Industrisë, Ndërmarrësisë dhe Tregtisë, znj. Rozeta Hajdari, mori pjesë në hapjen e seancës plenare të Sekretariatit të Përgjithshëm të EFTA ( Shoqata Evropiane e Tregtisë së Lirë) për nisjen e raundit të tretë të negociatave për tregtinë e shërbimeve, në kuadër të negociatave të Marrëveshjes së Tregtisë së Lirë me vendet anëtare të EFTA - Zvicra, Lihtenshtajni, Norvegjia dhe Islanda.

Ministrja Hajdari u mirëprit ngrohtë nga znj. Veseth Meling, Sekretare e Përgjithshme e Sekretariatit të EFTA-s dhe z. Frank Büchel, Zëvendës Sekretar i Përgjithshëm i Sekretariatit të EFTA-s, me të cilët bisedoi për sukseset e shkëlqyera diplomatike në mes Kosovës dhe vendeve anëtare të EFTA si dhe mundësitë e jashtëzakonshme për rritjen dhe forcimin e bashkëpunimit të bazuar në interesa të përbashkëta në fushën e ekonomisë, tregtisë dhe investimeve, përcjell albinfo.ch.

Në takimin vijues me Kryesuesit e Delegacioneve negociuese të vendeve anëtare të EFTA, Ministrja Hajdari i njoftoi për sukseset e vendit tonë me zhvillim ekonomik, demokratik dhe stabilitet të institucioneve qeverisëse, dhe i falënderoi për pjesëmarrjen aktive në dy raundet e fundit të negociatave me progres të dukshëm të arritur në kapitullin e mallrave, i cili në thelb është në fazën përfundimtare të negociatave për Marrëveshjen e Tregtisë së Lirë me vendet anëtare të EFTA-s.

Ajo njëherit, shprehu mirënjohjen për konfirmimin dhe nisjen e raundit të tretë të negociatave për tregtinë e shërbimeve, që do të shpalos potencialin e plotë të partneritetit tonë ekonomik me vendet anëtare në EFTA, ku nga kjo marrëveshje, bizneset e Kosovës do të fitojnë qasje të shtuar në tregun e EFTA-s, duke nxitur rritjen, inovacionin dhe krijimin e vendeve të punës, ndërsa konsumatorët në Kosovë do të përfitojnë nga një gamë më e gjerë mallrash dhe shërbimesh cilësore nga vendet e EFTA-s.

Përfundimi i kësaj marrëveshjeje është i rëndësisë së lartë për vendin tonë, gjersa palët kërkojnë të zgjerojnë bashkëpunimin në fusha me rëndësi të veçantë për të zgjeruar marrëdhëniet e tyre tregtare, siç janë flukset e investimeve, duke përfshirë transferimin e teknologjisë, politikën dhe ligjin e konkurrencës, prokurimin publik, tregtinë dhe zhvillimin e qëndrueshëm, si dhe të tjera politika dhe çështje të lidhura me tregtinë, duke përfshirë tregtinë e shërbimeve.

Për më tepër, përveç rëndësisë ekonomike, nënshkrimi i kësaj marrëveshjeje për Kosovën është i rëndësisë së njëjtë edhe në aspektin politik, sa i përket partnerëve të tjerë tregtarë dhe investitorëve të huaj.

---