Minoritarët nga Kosova, zero shanse për azil në Zvicër

Gjatë periudhës së deritashme të vitit 2013 nga Kosova kanë kërkuar azil në Zvicër 400 veta. Kuota e njohjes së azilit për kosovarët në Zvicër është 0.2 për qind

Në një artikull të zgjeruar që ka botuar gazeta “Thurgauer Zeitung” merret me valën e azilkërkuesve të ardhur nga Kosova, kryesisht romë e ashkali, të cilët janë paraqitur në Qendrën Federale të Pranimit të Azilkërkuesve, në Kreuzlingen, kantoni Thurgau.

Të porsaardhurit drejtojnë një sërë ankesash në adresë të autoriteteve kosovare por edhe të bashkëqytetarëve të tyre shqiptarë të Kosovës. Sipas tyre, diskriminimi të cilit ata i janë nënshtruar  në Kosovë vazhdon të jetë konstant.

Lidhur me këto ankesa, gazeta jep edhe qëndrimin e autoriteteve të Zvicrës, të cilat, bazuar në marrëveshjet e ndërkombëtare në fuqi, nuk u japin azil kosovarëve dhe as pjesëtarëve të minoriteteve të atjeshme.

“Enti Federal për Migracion (BFM) bën të ditur se gjatë periudhës së deritashme të vitit 2013 nga Kosova kanë kërkuar azil në Zvicër 400 veta. Rreth një e katërta e tyre janë të grupit etnik rom”. Pasi që Kosova, ashtu sikurse të gjitha vendet e Ballkanit konsiderohet “Safe Country” (vend i sigurt), pothuajse asnjeri nga të ardhurit nuk ka gjasa të fitojë statusin e refugjatit. Aktualisht kuota e njohjes së këtij statusi për kosovarët në Zvicër është 0.2 për qind, shkruan “Thurgauer Zeitung” duke iu referuar burimeve zyrtare.

Statusi i ”vendit të sigurt” i njihet Kosovës pasi që konsiderohet se forcat ndërkombëtare të sigurisë dhe Policia e Kosovës garantojnë sigurinë dhe janë në gjendje t`i mbrojnë pakicat etnike. Përmirësimet në bashkëjetesën ndëretnike, kanë pasur efekt pozitiv para së gjithash për romët, ashkalinjtë dhe egjiptianët e Kosovës. Mirëpo, për shkak të kushteve përgjithësisht të vështira, gatishmëria e tyre për të emigruar jashtë vendit vazhdon të jetë e madhe. Megjithatë prej disa javësh është arritur të frenohet një valë emigracioni që pritej të shënonte rritje, thuhet më tutje nga BFM.

Por ndërkaq, ndryshe e vlerëson gjendjen Amnesty International, ajo ka kërkuar që gjendja e romëve të shqyrtohet në bashkëveprim me autoritetet kosovare. Sipas saj pakicat në Kosovë vazhdojnë të diskriminohen, ndërsa integrimi i tyre social dhe ekonomik ka vështirësi për të bërë hapa përpara. Qasja në arsimim, sigurim shëndetësor, punësimi dhe hapësira e banimit mbeten të kufizuara. Mungon vullneti politik. Gjendja, nga shpallja e pavarësisë së Kosovës, sipas AI-së “assesi nuk është përmirësuar”, përfundon “Thurgauer Zeitung”.