Mogherini: Pa heqje të taksës, nuk ka dialog

Përfaqësuesja e Lartë e Bashkimit Evropian për Politikë të Jashtme dhe Siguri, Federica Mogherini, në një intervistë për REL ka folur për vazhdimin e dialogut mes Kosovës dhe Serbisë.

Mogherini është shprehur se pa u hequr taksa e Kosovës ndaj mallrave serbe dhe atyre të Bosnjë e Hercegovinës nuk sheh kushte për vazhdim të dialogut.

“Unë vazhdoj të besoj se marrëveshja është e mundshme dhe është afër. Besoj se dy palët e kuptojnë se është në favor të njerëzve të tyre të arrijnë marrëveshje të plotë, për normalizim të plotë (të marrëdhënieve), ligjërisht të obligueshme, që mbulon të gjitha aspektet e vështirësive që janë ende në tryezë.Por, nëse më pyesni se a ka gjasa të arrihet në tre apo katër muajt e ardhshëm, unë ju them se derisa tarifa që u ka vënë Prishtina mallrave të importuara nga Serbia dhe Bosnje e Hercegovina mbetet në fuqi, nuk shoh kushte për thirrjen e dialogut në nivel të lartë. Unë besoj se kjo është për keqardhje, sepse unë vërtet kam parë se elementet për marrëveshje për normalizim, ligjërisht të obligueshme, ekzistojnë”, ka thënë Mogherini në një intervistë për REL, transmeton Albinfo.ch.