Mot i acartë në Gjermani, anulohen dhe vonohen fluturimet në aeroportin e Berlinit

Akulli shkakton kaos në transport, kufizohen fluturimet nga dhe drejt Berlinit

Mot i ashpër dimëror ka shkaktuar ndërprerje të konsiderueshme në trafikun ajror dhe rrugor në verilindje të Gjermanisë. Aeroporti i Berlinit po përballet me vonesa dhe anulime fluturimesh për shkak të akullit dhe ngricave që kanë vështirësuar operimet në pistë, transmeton albinfo.ch.

Autoritetet aeroportuale kanë bërë të ditur se kufizimet në qarkullimin ajror pritet të vazhdojnë të paktën deri në mesditë, ndërsa pasagjerët janë këshilluar të kontrollojnë statusin e fluturimeve përpara nisjes drejt aeroportit.

Kushtet e vështira atmosferike nuk kanë prekur vetëm Berlinin. Probleme serioze në qarkullim janë raportuar edhe në landin Mecklenburg-Vorpommern, Brandenburg dhe zona të tjera përreth, ku ngricat dhe temperaturat e ulëta kanë krijuar rrezik të shtuar në rrugë.

Vështirësi janë shënuar gjithashtu edhe në transportin hekurudhor në verilindje të Gjermanisë, ku disa linja kanë pësuar vonesa për shkak të kushteve të motit.

Policia gjermane ka raportuar një numër të madh aksidentesh rrugore gjatë ditës së sotme, ku 19 persona kanë mbetur të lënduar, tre prej të cilëve janë dërguar për trajtim në spital. Autoritetet konfirmojnë se nuk ka viktima.

Ndër zonat më problematike është raportuar Autobani A10 pranë Potsdamit, ku kushtet e rrugës kanë shkaktuar disa aksidente dhe vështirësi në qarkullim.

Autoritetet u bëjnë thirrje qytetarëve dhe udhëtarëve të tregojnë kujdes të shtuar gjatë lëvizjes dhe të informohen paraprakisht për gjendjen e trafikut dhe fluturimeve. /Albinfo.ch

---