MPB, e shqetësuar për mosnjohjen e patentë shoferëve nga Serbia

MPB, e shqetësuar për mosnjohjen e patentë shoferëve të Kosovës nga ana e Serbisë.

Ministria e Punëve të Brendshme ka njoftuar qytetarët e Kosovës se është duke i shqyrtuar me seriozitet rastet e qytetarëve të cilët kanë hasur në vështirësi qarkullimi me patentë shoferët e Republikës së Kosovës, gjatë kalimit të tyre nëpër territorin e Serbisë.

Me këtë rast atyre u është kufizuar liria e lëvizjes.

“Me marrëveshjen e Brukselit në mes të Kosovës dhe Serbisë të vitit 2011, në kuadër të lirisë së lëvizjes, u mundësohet qytetarëve të dy vendeve të udhëtojnë lirshëm me patentë shoferët e shtetit përkatës. Pika e pestë e kësaj marrëveshjeje thotë: “Secila palë do të marrë të gjitha masat që t’ua mundësojë qytetarëve të palës tjetër të udhëtojnë lirshëm brenda dhe përmes territorit të njëra-tjetrës me patentë-shoferin e lëshuar nga autoritetet e veta”, ka njoftuar ministri i MPB-së, Bejtush Gashi, përcjell Albinfo.ch.

Gjithashtu MPB ka kërkuar nga të gjithë qytetarët e Kosovës që lëvizin me veturë nëpër territorin e Serbisë, e të cilët kanë hasur në situatat e tilla, të lajmërohen në policinë kufitare ose në stacionin më të afërt të Policisë së Kosovës.

Gjithashtu, qytetarët mund të kontaktojnë me Ministrinë e Punëve të Brendshme përmes këtyre kontakteve: [email protected]; 038 200 19 545 apo 045 149 111.