“Munishi AG”, në konferencën e Shoqatës së Përpunuesve të Drurit të Kosovës

“Javën e kaluar pata privilegjin të marr pjesë në konferencën e Shoqatës së Përpunuesve të Drurit të Kosovës. Shkëmbimi me kolegët për bashkëpunime të mundshme me kompanitë zvicerane ishte jashtëzakonisht pasurues. Veçanërisht mbresëlënëse ishte fjalimi frymëzues i kryeministrit Albin Kurti”.

Kështu shprehet për albinfo.ch Gjergj Munishi, bashkëpronar i kompanisë së njohur për prodhimin e mobilerive nga druri, “Munishi AG”, me seli në Wil të Zvicrës.

“Një tjetër pikë kulmore ishte pjesëmarrja ime në juri, ku pata nderin të ndaj çmime për talentët e rinj që impresionuan me punën e tyre krijuese. Kjo përvojë më dëshmoi edhe një herë se çfarë potenciali mbresëlënës ka brezi i ardhshëm në Kosovë”, thotë më tutje Gjergj Munishi.

Industria e përpunimit të drurit në Kosovë, gjatë viteve të fundit ka shënuar rezultate të lakmueshme, duke u bërë dega me ngritjen më të madhe si në prodhim, ashtu dhe në eksportet jashtë vendit, ku Zvicra zë një vend të veçantë.