Muriqi flet për golin e shënuar dhe ofertat për të

Sulmuesi i Kosovës ka shënuar golin vendimtar për skuadrën e tij në fitoren e ngushtë 2-1 ndaj Ankargucus

Vedat Muriqi ka vazhduar të shkëlqejë në futbollin turk me Fenerbahcen.

Sulmuesi i Kosovës ka shënuar golin vendimtar për skuadrën e tij në fitoren e ngushtë 2-1 ndaj Ankargucus.

Pas ndeshjes Muriqi ka folur për mediat turke, duke thënë se nuk është me rëndësi nëse shënon ose asiston, pasi suksesi i ekipit ka më shumë rëndësi.

“Nuk është me rëndësi nëse shënoj gol apo asistoj. Me rëndësi është që të kemi sukses si ekip. Jam i lumtur për golin e realizuar. Kemi marrë tri pikë të mëdha para derbit Galatasaray”, tha Muriqi që tregoi se dëshiron të realizojë gol edhe në derbin ndaj Galatasarayt.

“Do të doja të realizoja gol edhe në ndeshjen më të madhe në Turqi. Por, thashë më parë se puna në ekip është më e rëndësishme”, vazhdoi tutje kosovari.

Prizrenasi u pyet edhe rreth interesimit të skuadrave të mëdha, si Manchester United, Tottenham Hotspur, Atletico Madrid, Lazio, Napoli apo Fiorentina raporton Telegrafi.

“Sa i përket interesimeve të klubeve është normale pas paraqitjeve të mira. Por, aktualisht jam i fokusuar te klubi im. Dua të bëj histori me Fenerbahçen. Të ardhmes nuk i dihet”, përfundoi sulmuesi i Kosovës, përcjell Albinfo.ch.

---