Mynih: 6,500 pasagjerë detyrohen të kalojnë natën në aeroport

Pas një alarmi të ri, mijëra udhëtarë të bllokuar për shkak të kaosit nga dronët

Një situatë e pazakontë ka shkaktuar kaos në Aeroportin Ndërkombëtar të Mynihut për të dytën natë radhazi, pasi alarmet për praninë e dronëve kanë detyruar pezullimin e operacioneve ajrore dhe kanë bllokuar mijëra pasagjerë, shkruan albinfo.de.

6500 udhëtarë të bllokuar, dronët ndërpresin fluturimet

Të premten në mbrëmje, rreth orës 23:00, Policia Federale raportoi dy raste të shikimit të dronëve në zonat e pistave veriore dhe jugore të aeroportit. Oficerët konfirmuan se dronët u larguan para se të mund të identifikoheshin. Për shkak të këtyre incidenteve, fluturimet u pezulluan menjëherë, duke lënë rreth 6,500 pasagjerë të bllokuar, të cilët ishin të detyruar të kalonin natën në ambientet e aeroportit, shkruan albinfo.de,

Operacionet pezullohen për herë të dytë në dy ditë

Ky është incidenti i dytë i ngjashëm në më pak se 48 orë në aeroportin e dytë më të madh të Gjermanisë. Autoritetet konfirmuan se pas shikimit të dronëve, shumë fluturime u devijuan ose u anuluan. Sipas të dhënave zyrtare, 23 fluturime mbërritëse u devijuan dhe 12 fluturime të tjera u anuluan gjatë së premtes në mbrëmje.

Fluturimet rifillojnë me vonesë, pasiguri për pamjet e reja

Trafiku ajror rifilloi të shtunën në mëngjes në orën 07:00, dy orë më vonë se zakonisht. Megjithatë, vonesat dhe anulimet kishin lënë pasoja te pasagjerët, ndërkohë që informacioni për një pamje të re të një droni në orët e para të mëngjesit të së shtunës mbeti i pakonfirmuar nga autoritetet. Policia Federale vijon hetimet për të zbuluar se kush qëndron pas këtyre incidenteve.

Strehim i përkohshëm për pasagjerët

Operatori i aeroportit raportoi se për shkak të situatës së papritur u morën masa për strehimin e pasagjerëve të bllokuar, përfshirë vendosjen e shtretërve kamping në ambientet e brendshme të terminaleve.

Rreziku nga dronët, një kërcënim në rritje për sigurinë ajrore

Ky incident thekson edhe një herë rrezikun që paraqesin dronët për sigurinë ajrore. Ndërhyrjet e tyre në hapësirën ajrore përreth aeroporteve janë gjithnjë e më të shpeshta dhe përbëjnë sfidë serioze për autoritetet, duke kërkuar masa më të forta ligjore dhe teknologjike për monitorim dhe neutralizim të tyre. /Albinfo.de

---