”Nature Medicine”: Nivele të larta të grimcave plastike në trurin dhe mëlçinë e njeriut

pixabay

Grimcat plastike po grumbullohen në indet njerëzore në nivele gjithnjë e më të larta, tregon një studim i ri i botuar dje në revistën ”Nature Medicine”.

Studimi i drejtuar nga Matthew Campen i Universitetit të New Mexico, tregon nivele më të larta të nano dhe grimcave plastike në mëlçi dhe trurin e njerëzve të vdekur në vitin 2024 krahasuar me ato të njerëzve të vdekur në 2016.

Sipas studimit ndotja ishte veçanërisht e lartë në tru, me nivele deri në 30 herë më të larta se në organet e tjera si mëlçia ose veshkat.

Ndërsa mikroplastika është zbuluar më parë në organe si mushkëritë, zorrët dhe madje edhe placenta, mikroskopi tradicional zakonisht identifikon vetëm grimcat më të mëdha se 5 mikrometra.

Një mikrometër është 1/1 000 e milimetrit dhe një nanometër një e milionta e milimetrit.

Ekipi i Campen përdori mikroskop të avancuar me rreze infra të kuqe dhe elektronike, gjë që i lejoi ata të zbulonin këto grimca më të vogla me saktësi më të madhe.

Studiuesit analizuan mostrat e indeve nga 24 individë të vdekur në vitin 2024 dhe i krahasuan ato me 28 mostra nga viti 2016.

Ndërsa nivelet e nano dhe mikrogrimcave plastike në veshka mbetën kryesisht të pandryshuara, mëlçia dhe truri treguan rritje.

Studimi gjithashtu identifikoi nivele alarmante të mikroplastikës në trurin e njerëzve të diagnostifikuar me demencë.

Dymbëdhjetë mostra të trurit, të mbledhura midis viteve 2019 dhe 2024, përmbanin midis 12 000 dhe 48 000 mikrogramë plastikë për gram.

Megjithatë, studiuesit thanë se këto gjetje janë shoqëruese dhe nuk krijojnë një marrëdhënie të drejtpërdrejtë shkak-pasojë.