Ndarja e Kosovës është lojë e rrezikshme si shpërbërja e Jugosllavisë

Për çmimin e euro-integrimeve të Serbisë dhe anëtarësimin e Kosovës në OKB, presidentët Aleksandër Vucic dhe Hashim Thaçi, janë të gatshëm të pranojnë një marrëveshje të tillë. Thaçi bile do duhet të jap edhe hidrocentralin e Gazivodës dhe Trepçën.

Tema e korrigjimit të kufijve mes Kosovës dhe Serbisë po gjen jehonë te shumë gazetarë të huaj gjermanofonë dhe anglofonë. Përjetuesi i “Kohës së artë” të Jugosllavisë së Titos, Paul Lendvai ka shkruar gjithashtu rreth kësaj teme në “Der Standard”.

“Shkatërrimi i Jugosllavisë shumë etnike, jo vetëm që e kam përjetuar vetë, por kam punuar edhe si korrespodent për të raportuar ngjarjet dramatike. Për këtë jam skeptik, bile shpesh mosbesues, kur papritur flitet për shkëmbim territoresh mes Serbisë dhe Kosovës,” shkruan Lendvai, përcjell albinfo.ch.

Ai citon edhe njohësin e Jugosllavisë, të ndjerin Viktor Meier, i cili në librin e tij “Trashëgimia jugosllave” shkruante: “Ëndrrat e tilla janë kundrejt çdo arsyetimi real, sepse këtu duhet të ndryshosh kufij ndërkombëtarë, dhe kjo nuk është një makth vetëm për Serbinë, por edhe për Maqedoninë dhe Greqinë, sepse kjo lidhje veri-jug papritur do kontrollohet nga territori me dominim shqiptar.”

Megjithatë, për çmimin e euro-integrimeve dhe anëtarësimin e Kosovës në OKB, presidentët Aleksandër Vucic dhe Hashim Thaçi, janë të gatshëm të pranojnë një marrëveshje të tillë. Thaçi bile do duhet të jap edhe hidrocentralin e Gazivodës dhe Trepçën. Për opozitën serbe, shkëmbimi i territoreve kundërshtohet pasi në mes të Kosovës jetojnë mijëra serbë.

Më tej, sipas opinionit të Paul Lendvai, ndryshimi i kufijve do ishte hapja e “Kutisë së Pandorës”, veçanërisht për Bosnjën, që do ndaheshte ne tresh, si dhe Maqedoninë, ku shqiptarët do kërkonin bashkim me Shqipërinë.

“Kancelarja gjermane Angela Merkel paralajmëroi rrezikun e shkëmbimit të territoreve në Ballkan. Gjithsesi, zjarrvënësi më i rrezikshëm i politikës botërore qëndron ulur në Uashington. Pas debaklit në Kore, këshilltari i sigurisë së presidentit Donald Trump, në kontrast të plotë me politikën shumvjeçare të SHBA-së në Ballkan, i dha dritë jeshile një eksperimenti të ri mjaft të rrezikshëm – kësaj here me një tjetër Fuçi Baruti,” shkruan në fund opinionisti austriak.

---